ဇူလိုင်-၁၃-၂၀၂၅
နွယ်နီ/VOM
UWSA “ဝ” တပ်ဖွဲ့က သူတို့ဒေသအတွင်း ခရိုင်လေးခုမှာရှိတဲ့ စစ်ဆေးရေးဂိတ်တွေကို ဇူလိုင် ၁၁ ရက်နေ့က စပြီး ဖယ်ရှားလိုက်တယ်လို့ ဒေသခံတွေက ပြောပါတယ်။
မိုင်းပေါက်၊ မိုင်းလင်း၊ မိုင်းမော၊ ဟိုပန် ခရိုင်ချင်းဆက် လမ်းပေါ်က စစ်ဆေးရေးဂိတ်တွေကို ဖယ်ရှားလိုက်တာလို့ ဒေသခံတွေက ပြောပါတယ်။
“ဟုတ်တယ်၊ အဲဂိတ်တွေ အခု မရှိတော့ဘူး” လို့ ဟိုပန်မြို့မှာ နေထိုင်တဲ့ အမျိုးသမီးတယောက်က ပြောပါ တယ်။
UWSA “ဝ” တပ်ဖွဲ့ ဆက်ဆံရေးတာဝန်ရှိသူ ညီရမ်းကလည်း ပြည်သူတွေ သွားလာရလွယ်ကူအောင် ဂိတ်တွေ ဖယ်ရှားပေးလိုက်တာလို့ ပြောပါတယ်။
“အဓိကတော့ ပြည်သူလူထု အသွားအလာ လွယ်ကူမြန်ဆန်စေရေးအတွက် ပြည်နယ်အတွင်းက ဂိတ်တွေ အကုန်လုံး ဖယ်ရှားလိုက်ပါတယ်” လို့ဆိုပါတယ်။
အဲဒီစစ်ဆေးရေးဂိတ်တွေကို ၁၀၂၇ စစ်ဆင်ရေးကာလမှာ စစ်ဆေးမှုတွေ တင်းကြပ်ထားခဲ့တာပါ။
အခုလို ဂိတ်တွေ ဖယ်ရှားလိုက်တဲ့အတွက် ဒေသအတွင်း ကုန်စည် သယ်ဆောင်မှုနဲ့ သွားလာမှု ပိုမို အထောက် အကူဖြစ်တယ်လို့ ဒေသခံတွေက ပြောပါတယ်။
ပြည်နယ်အတွင်းက ဂိတ်တွေကိုသာ ဖယ်ရှားခဲ့တာဖြစ်ပြီး “ဝ” ဒေသနဲ့ မြန်မာပြည်မ ဆက်သွယ်ထားတဲ့ ဂိတ်တွေကတော့ ပုံမှန်အတိုင်း ရှိနေတယ်လို့ “ဝ” တပ်ဖွဲ့ဘက်က ဆိုပါတယ်
။
ပုံ – CJ
